അദ്ദിക്ർ

10: 100 ല്‍ വിവരിച്ച പ്രകാരം വിശ്വാസിയാകാനുള്ള നാഥന്‍റെ സമ്മതപത്രമായ അദ്ദിക്ര്‍ കൊണ്ട് വിശ്വാസികളാവുകയും അത് ലോകര്‍ക്ക് എത്തിച്ചുകൊടുത്തുകൊണ്ട് നിഷ്പക്ഷവാനായ നാഥനെ സഹായിച്ചുകൊണ്ടിരിക്കുകയും ചെയ്യുന്നവര്‍ക്ക് ഫിര്‍ദൗസ് പൂന്തോപ്പുകള്‍ വിരുന്നായി ലഭിക്കുമെന്ന് 18: 107 ലും 32: 19 ലും പറഞ്ഞിട്ടുണ്ട്. നിശ്ചയം പുണ്യാത്മാക്കള്‍ കര്‍പ്പൂരം ചേരുവയായിട്ടുള്ള പാനപാത്രങ്ങളില്‍ നിന്ന് കുടിക്കുന്നവ രാണെന്ന് 76: 5 ലും പറഞ്ഞിട്ടുണ്ട്. 83: 18 ല്‍, പുണ്യാത്മാക്കളുടെ കര്‍മ്മരേഖ സ്വര്‍ഗ്ഗത്തിലുള്ള ഇല്ലിയ്യീനിലാണ് എന്നും; 82: 13; 83: 22 സൂക്തങ്ങളില്‍ നിശ്ചയം പുണ്യാത്മാക്കള്‍ അനുഗ്രഹ കേദാരങ്ങളിലാണ് എന്നും പറഞ്ഞിട്ടുണ്ട്. ഇവിടെ പറഞ്ഞ പുണ്യാത്മാക്കളില്‍ വിചാരണ കൂടാതെ സ്വര്‍ഗത്തിലേക്ക് പോകുന്ന സാബിഖീങ്ങളും വിചാരണക്കുശേഷം സ്വര്‍ഗത്തിലേക്ക് പോകുന്ന വലതുപക്ഷക്കാരും ഉള്‍പ്പെടുന്നതാണ്.     

ഈ സൂക്തം വായിക്കുമ്പോള്‍ വിശ്വാസി ആത്മാവുകൊണ്ട് 'ഓ ഞങ്ങളുടെ നാഥാ! അദ്ദിക്റിനെ സത്യപ്പെടുത്തിക്കൊണ്ടും പിന്‍പറ്റിക്കൊണ്ടും ജീവിക്കുന്ന മുന്‍കടന്നവരിലും പുണ്യാത്മാക്കളിലും ഞങ്ങളെ നീ ഉള്‍പ്പെടുത്തേണമേ' എന്ന് പ്രാര്‍ത്ഥിക്കേണ്ടതാണ്. 2: 25, 177; 3: 136 വിശദീകരണം നോക്കുക.